Abuztuaren 8a Emakumeen Orgasmoaren Nazioarteko Eguna da. Egunaren jatorria Esperantina Brasilgo hirian abiatutako ekimen bati lotuta dago. 2001ean, Arimatéia Dantas zinegotzi ohiak “Orgasmoaren Eguna” sortzea proposatu zuen, sexualitatearen inguruan hitz egiteko, aurreiritziak apurtzeko eta emakumeen plazerari arreta handiagoa eskaintzeko. Denborarekin, ospakizuna beste herrialde batzuetara zabaldu eta emakumeen orgasmoaren inguruko aldarrikapenarekin lotu da.

Egun honen helburua emakumeen plazera eta sexualitatea ikusaraztea da, historikoki gai horien inguruan egon diren tabu, mito eta aurreiritziei aurre eginez. Aldi berean, norberaren gorputza ezagutzeko, sexualitateaz askatasunez hitz egiteko eta plazera sexu-ongizatearen parte gisa aldarrikatzeko eguna da.

Emakumeen plazera bigarren mailako gisa kontsideratua izan da eta, ondorioz, sexu-harremanetan ere desberdintasunak existitzen dira: ikerketek erakutsi dute harreman heterosexualetan emakumeek gizonek baino orgasmo gutxiago izaten dituztela, eta honi orgasmo-arrakala deitzen zaio.

Gainera, ba al zenekien klitoriaren anatomia osoa duela gutxira arte ez zela behar bezala irudikatzen anatomia-liburu askotan? 1998tik aurrera Helen O’Connell urologoak eta bere taldeak egindako ikerketek, eta bereziki 2005ean erresonantzia magnetikoaren bidez argitaratutako lanek, klitoriaren egitura osoa eta haren barneko zatiak zehaztasun handiagoz erakutsi zituzten. Ordura arte ohikoa zen klitoria kanpotik ikusten den zati txikira mugatuta irudikatzea. Horrek agerian uzten du emakumeen gorputzak eta plazera historikoki zenbateraino izan diren gutxiago ikertuak eta ezagutuak.